USDP party nih Korea kan in kal ter hna lai tiin phung ning lo in riantuantu an khawmh hna

Union Solidarity and Development Party (USDP) nih Korea ram ah kan in kal ter hna lai tiin riantuan a duh mi an khawmh hna i phaisa an hal len hna tiah kan theih.

USDP party nih Korea kalnak kan in tuah piak hna lai tiin 2023 kum caanceo hrawng in an rak ti i mino he tonnak hna an rak ngei, atu hi riantuantu khawmhnak an tuah cuahmah hi a si.

USDP party he ai naihniam mi nih ” U Hla Swe le Korea-Myanmar pehtlaihnak commitee chairman tonnak an ngei. cu tonnak a dih hnu ah a tu bantuk in Korea kalnak tuah ding in an timhlamhnak hi a si. kal a duh mi hna cu caantawi training an kai ter ta hna” tiah a chim. cu training cu USDP party zung khan ah an tuah i riantuan a duh mi minung a thong leng in an khawmh hna tiah a chimchap.

” Hi bantuk in Korea kal a duh mi hi a voikhatnak ah sing 15 (MMK) an hal hna. mi cheukhat cu training man lawng an pek rih. kal le kal tak lo a fian rih lo caah a pe rih lo mi zong an um” tiah a chim chap. hi korea kal khawh nakding caah hin a tlawm bik kawlram tangka in ting 50 tel cu tun a hau tiah a chim.

ramleng ah riantuantu an thlah ding a si ahcun riantuantu khawmhnak lisense ngeih lawng ah tuah khawh ding mi a si nain, ramkhel party nih hitin an tuah mi hi phung ning lo in tuah mi a si tiin an chim. hi phungning loin ramleng kalternak tuah mi case in taza cuai ahcun thong kum 7 thlak khawh mi case a si.

1 Comment

Leave a Reply

Your email address will not be published.


*