Taungyi ah meithlah puai (Tasaungdaing) ah a ra mi poh NRC le hmanthlak kawl ralkap sin ah an pek ter hna

Shan ramkulh khualipi Taungyi khua ah kawl paui tasaungdaing (meialh thlah puai) ah a hong rami, khuami, ralzam an si ah khual an si ah an dihlak in rammi sinak NRC (hmatpungtin) le an hmanthlak kawl ralkap sin ah an pek ter dih hna tiah RFA nih a tial.

Taungyi ah an tuah mi Tasaungdaing paui hi November 21 in November 28 tiang tuah ding a si. Hi puai a zawh ding poh cu November 19 tein kawl ralkap nih an hmanthlak le NRC cu an hal dih hna tiah kan theih.

Shan ramkulh chaklei ah MNDAA, TNLA le AA hna nih 1027 kahdohnak min pu in kawl ralkap sakhan an lak cuahmah lio ah shan ramkulh khualipi ahcun kawl ralkap nih venhim mi Tasaungdaing paui cu hlunghlai ngai in an tuah tiah kan theih.

Shan ramkulh thlang lei ah a um mi Kaya ramkulh in ralzam hna cu Taungyi lawng si lo in khuate zong ah umnak nawl pek lo ding in kawl ralkap nih nawl an rak chuah. Cheukhat ralzam cu shan ram ah luh a ngah lo an ti hna I an khirh than hna. Nain hi Tasaungdaing puai tuah lai belte ahcun ralzam tam pi an chohlan than hna hi a si.