Kawl ralkap sakhan 40 leng kan lak cang tiah AA nih an thanh

Kawl ralkap sakhan cu 40 leng kan lak khawh cang tiah Rakhine hriamtlai Arakan Army (AA) nih November 22 ah an thanh.

November 14 in November 24 chung nihra chung ah kawl ralkap nih hmun an khuarnak sakhan pali cu kan tuk I kan lak, cu pin ah kawl ralkap an zam tak mi sakhan tampi zong kan lak I hmun kan khuar, kan lak mi dihlak ah sakhan 40 tluk hrawng a si cang tiah AA nih an thanh.

 

Cu pin ah kawl ralkap nih ral hmaisuang ah hman ding in Pauk Taw khua ah an tlaih mi mipi 100 leng cu kan chanhchuah khawh hna tiah AA nih November 22 an thanh mi ah an telh. Kawl ralkap thawngthanhnak lei tuanvo ngei tu Zaw Min Htun nih cun AA nih Pauk Taw khua lak an duh caah khuami an thawl hna tiin an thanh. Nain AA nih Pauk Taw khua an lak nak kong he pehtlai in zeihmanh a chim lo.

 

Rakhine ram ah AA le kawl ralkap kahdohnak ruang ah innchungkhar 4000 in 5000 karlak milurel in 25000 leng cu ralzam dirhmun ah an um than tiah UNOCHA nih an thanh. Rakhine ah ralzam an karh ko nain kawl ralkap nih Rakhine ramchung luhkhawh nak lam a si mi tlangcung lam le tilawng lam ning in an phih dih caah bawmhchanhnak thilri a lut kho lo caah Rakhine mipi nih harnak an tuar ngai tiah an langhter.