Monywa AMaTa-508 sakhan in thil cawk ah a chuak mi ralbawi pakhat le ralkap nu pahnih an tlaih hna

Novembere 29 ah Sagaing ramthen, Monywa khua ah hmun a khuar mi kawl ralkap AMaTa-508 sakhan in ralbawi hlun Tin Win le a kawl ralkap nu pahnih cu thilri cawk ding ah an chuah lio ah an I citmi ralkap thilri phurhnak motor cu Black Falcon Guerrilla Force phu in ralkap hna nih an kham I an tlaih hna lio ah ralbawi hlun Tin Win cu a zaam caah meithal in an kah thah tiah kan theih khawh.

Cu an tlaih hna nak cu kawl ralkap an sakhan he 1000meters ai hlatnak ah a si I voidang tawn an duhherh thilri cawk caan ah cun ralbawi 1 le a kuttang minung 2 an chuak tawn nain dothlennak phu hna nih an tlaih hna lio ah cun ralbawi hlun 1 le a kawl ralkap nu 2 lawng an I tel. An tlaihmi ralkap nu pahnih cu Monywa PDF nih biaceihzung sin ah an kuat hna tiah kan theih khawh.

“Kawl ralkap nu pahnih cu kan tlaih khawh hna. Pakhat cu KyaukSitPung hriamngan a kap mi nu phu an hruaitu a si I pakhat cu chungtel sawhsawh a si. Kahdohnak a um lio ah hi hna pahnih cu mipi bantuk in thil an I hruk I an rak chuah hi a si. Voidang thilri cawk an chuah tawn ah cun ralbawi pakhat le a kuttang ralkap pahnih an si tawn I meithal pahnih an I ken tawn I an mah an si than lai tiah kan ruah. A rak chuak mi ralbawi hlun pakhat le ralkap nu pahnih cu civil thuam an I hruk caah hriamnam cu kan la kho lo nain kawl ralkap he ai pehtlai mi thilri tu tlawmpal kan ngah” tiah Black Falcon Guerrilla Force in tuanvo neitu pakhat nih a chim.

Cu an tlaih mi hna sin in kawl ralkap an thilri a phur tawn tu motor pakhat le handphone 3 leng ah kawl ralkap he ai pehtlai mi thilri tlawmpal an lak chap tiah kan theih khawh.