Karenni ramkulh ah caankarlak biaceihnak phunglam cu fehter a si cang

Karenni miphun an umnak Kaya ramkulh cu kawl ralkap nih uknak an lak le cangka 2021 kum thok kawl ralkap dohnak ah hmaisuang ah a rak I tel mi ramkulh an si. Kawl ralkap nih sualnak an tuah mi le hramhram in mizapi uknak an lak mi kong ah an miphun ning tein dothlennak an tuah tiah kan theih.

Kawl ralkap dohnak ah hmai a suang mi Karenni ram cu kawl ralkap nih an ral tuk ve caah an ramkulh ning in kahdohnak ruang ah ralzam mi tampi an um. Kawlram chung ah a um mi ramkulh le ramthen vialte lak ah khualipi tiang ah dothlennak phu nih kahdohnak fak an tuah khawh nak cu Karenni lawng ah a si rih. Hi karenni ramkulh ah kahdohnak ah karenni mino tampi an I tel nak KNDF le PDF tibantuk bu hna nih Karenni ramchung ah a um mi kawl ralkap vial te cu an tuk hna I atucu an khualipi a si mi Loikaw khuachung um mi kawl ralkap hmun khuarnak tampi zong an lak khawh tiah kan theih.

Cu bantuk khuachung an lak mi le an mah nih an control khawhnak hmunhma ah sualnak le palhsualnak a um mi cung ah tawlrel khawh nak caah upadi phung an ser I an fehter cang tiah kan theih.