AA nih kawl ralkap sakhan an lak than

Chin ram thlanglei Paletwa peng ah SAC ralkap nih ttha taktak in an sak mi camp cu AA nih tlamtling tein an lak khawh cang tiah an langhter.
Paletwa peng ah SAC ralkap nih camp ttha bak mi le hriamnam ttha ttha tling tein an chiah nak Nung Bu camp cu December 10 ni zaan sml 11:45pm ah AA ralkap nih tlamtling tein an lak khawh cang tiah AA nih an langhter.
Chinram kulh Paletwa peng ah a um mi SAC ralkap caah a biapi ngai mi camp Ta ron Ain le Nung Bu camp hi November 14 ni ah khan AA nih cun an rak nam caah hna. Nikhat zong hrelh loin AA nih cun an kah hna caah December 4 ni ah khan Ta Ron Aing Camp cu tlamtling tein an rak lak khawh. Cu hnu ah NungBu camp zong biatak tein an nam hna i a ni 27 nak December 10 zaan sml 11:45pm ah tlamtling tein an lak khawh ve tiah AA nih an langhter.
Camp lak kahdohnak ahhin SAC ralkap commander pa telh in ralkap tampi an thi, hliam a tuar mi an tam hlei ah hriamnam tor le cheng bak an lak piak fawn hna. Asinain SAC ralkap nih cun Vanlawng in siseh, miakpi in siseh, Tilawng in siseh fak tuk in a kah ve hna caah AA ralkap a thi le hliamtuar an tam ngai ve tiah an langhter.
Tutan ah AA nih an lak camp 2 hi SAC ralkap caah a biapi tuk mi an si. India le an tuah cuahmah mi Kaladan project caah siseh, Chin le Rakhine ramri ah a um mi a si fawn caah ral he pehtlaiin a biapi tuk mi camp an si.
Hi camp pahnih an lak hnu ahcun Paletwa khuapi lak zong a fawi deuh cang lai tiah ramkhel cuantu hna nih an zumhnak an langhter. AA ralkap hna nih cun SAC ralkap camp dangdang zong lak an timh tthan hna caah kahdohnak an tuah cuahmah ko rih tiah AA nih cun an langhter.

2 Comments

Leave a Reply

Your email address will not be published.


*