Khampat kahdohnak ah kawl ralhrang minung 10 kahthah an tong

Khampat khuapi pawng kahdohnak ah SAC ralkap 10 leng an thi, hriamnam phun 17 an laak khawh tiah kan theih. Sagaing ramṭhen, Tamu peng Khampat khuapi lei ah rallam a sialmi SAC ralkap le tualchung dothlennak hriamtlai ṭangṭi phu kar kahdohnak ah ralkap 10 leng an thi i ṭangṭi phu nih hriamnam phun 17 an laak khawhnak kong NUG Ministry of Defence nih a langh ter.

Sagaing ramṭhen, Tamu pengkomh, Khampat khuapi lei ah SAC ralkap 200 hrawng rallam sial in a kalmi le tualchung dothlennak hriamtlai ṭangṭi phu cu nihin December 16 zinglei ah an i kap i ralkap hruaitu an ralbawi pakhat telh in minung 10 hrawng an thih pinah SAC lei cu hnu an tolh. Cu kahdohnak ah cun dothlennak ṭangṭi phu hna nih MA-10 RPG 7 meithal 1, MG-3 meithal 1, MA-S1 MK2 meithal 1 telh in hriamnam phun 17 an laak khawh tiah kan theih khawh chap.

Khampat khua pawng kahdohnak ah cun Sagaing ramṭhen PDF in Special Battalion, pengkomh Battalion, Pah-Kah-Phah, RCDF le CNDF hna an ṭangṭi, tiah NUG Ministry of Defence nih an langh ter.

 

Be the first to comment

Leave a Reply

Your email address will not be published.


*