Shan ram ah ralbawm ding in a kal mi kawl ralkap ceilak an thi

Namkham peng ah ralbawm ding in a kal mi SAC ralkap a thi mi an tam tiah kan theih. Shan ram chaklei ah Namkham ah ralbawm ding in Helicopter in a va chiah mi SAC ralkap hna cu TNLA nih an rak kah hna caah a thi mi an tam hlei ah hriamnam tor le cheng an lak piak hna tiah TNLA nih an langhter.

December 12 ni ah Namkham khuapi Sakhan Tit camp sungh lai phan ruangah SAC ralkap nih cun Helicopter in ralkap thazaang a chap hna. Helicopter in voi thum bak ralkap minung 100 renglo a chiah mi hna cu PSLF/TNLA nih cun December 15 ni tiang zongah heh tiah an dawi hna i an kah lengmang hna.

Cucaah SAC ralkap a thimi an tam hlei ah hliam a tuar mi zong an tam. Kahdohnak ah SAC ralkap nih an zaam tak mi meithal phunphun zuun 39 le kuan tam taktak le thilri dangdang an lak piak hna. Cun SAC ralkap Captain rank a si mi pakhat telh in ralkap zei maw zat zong an ruak an va hmuh hna.

Cu lawng hlah SAC ralkap Major Mawng Sain Caw Ttu Awn, sergeant Myo Min Tanh, ralkap Myo Khaing le Kawi Tthet Zaw le tiin an dihlak minung 4 a nung in an tlaih hna tiah an langhter.