Gangaw peng ah kawl ralkap hriamngan ruang ah kum 3 hngakchia telh in minung 2 an nunnak a liam

Gangaw peng, ShungShi khua cu kawl ralkap nih 120mm a sau mi hriamngan in an kah caah kum 3 hngakchia telh in minung 2 an nunnak a liam tiah kan theih.

Magaway ramthen, Gangaw peng, ShungShi khua cu kawl ralkap hna nih 120mm a sau mi hriamngan in an kah caah kum 3 hngakchia pakhat le kum 70 tluk a si mi pitar pakhat an nunnak a liam tiah PDF-Gangaw nih a chim.

December 16 zaanlei suimilam 3:03 tluk ah Gangaw khua ah hmun a khuar mi kawl ralkap hriamngan phu nih 120mm a sau mi hriamngan in Shungshi khua cu a kah I mipi inn pakhat cung a tlak caah minung 7 hliam hma an tuar, cu hliam tuar hna chung in kum 3 hngakchia pakhat le kum 70 a si mi pitar pakhat an nunnak a liam tiah kan theih.

Kawl ralkap hna nih mipi umnak khua chung ah hriamngan an kah mi hi PDF-Gangaw lei in fak piin kan doh I mipi hna zong nih hriamngan aw nan theih sual ah cun fak pin I ralrin ding tiah PDF Gangaw nih a thanh.