Shinletwa Sakhan In A Zaammi SAC Ralkap 10 Nak Tlawm Lo tlaih An Si

Chinram, Paletwa peng um Shinletwa SAC ralkap sakhan in a zaam mi SAC ralkap pawl cu Maraland Defense Force (MDF) nih an dawi hna i kaphnih in kahdohnak a chuah hnu ah SAC ralkap 6 hrawng an thi i ralkap 10 nak tlawm lo an tlaih hna kong Maraland Defense Force (MDF) nih an chim. Shinletwa sakhan in a zaam mi SAC ralkap pawl cu January 5 zanlei suimilam 5:00 hrawngah Myanmar-India ramri hmun pakhat ah AA le MDF nih an kah hna, tiah theih a si.  SAC ralkap 200 deng an umnak Shinletwa sakhan cu AA le Maraland Defense Force (MDF) ṭangṭi phu nih January 2 ah a dihlak in an rak laak, tiah theih a si. Karenni ramkulh, Bawlakhe Myoma palik sakhan in palik 6 le Kani Myomyo palik sakhan in nu palik cu an hriamnam i put in KNDF sin an i peknak kong KNDF hmunpi nih an thanh.

 

A luancia November 21 ni ah Bawlake Myoma palik sakhan in pa palik 3, nu palik 2 cu hriamnam 5 le kuanfang i put in KNDF sin ah an rak lut. Cun, December 5 ni ah pa palik pakhat cu meithal pakhat i put in a chungkhar he KNDF sin ah an i ap, tiah theih a si. Cu bantuk ṭhiam in Sagaing ramṭhen, Kani Myoma palik sakhan in nu palik pakhat cu kutcheh bomb i put in tualchung hriamtlai phu sin ah aa apnak kong ADPRA hriamtlai phu in ṭuanvo ngei pakhat nih Media ah a chim. January 3 ni ah Kani peng myoma palik sakhan ah rian an khinhmi nu palik Zin Ma Lwin cu palik sakhan chung um kutcheh bomb i put in a chungkhar he mizapi sin ah an i fonh, tiah theih a si. Hriammam chiah in tualchung hriamtlai phu sin ah aa apmi palik 7 hna cu an i apnak ṭuanvo ngeitu hna nih an rak thanh cang bantukin phungning tein tangka an pek hna.

Be the first to comment

Leave a Reply

Your email address will not be published.


*