Kawl ralkap nih Kanan khua ah bomb a thlak caah minung 15 an nunnak a liam

Sagaing ramṭhen, Tamu peng, Khampat khuapi pawng Kanan khua Biakinn cu SAC ralkap nih nihin January 7, zing suimilam 9:00 hrawng ah raltuknak vanlawng Jet Fighter in bomb lung 10 hrawng an thlak ruang ah aa pum liomi ngakchia telh in tualchung mi ruak 15 char a si cang, tiah theih a si.

Kanan khua Biakinn bomb thlaknak kong he pehtlai in Kanan khuami pakhat nih cun, “Atu bantukin thil a cannak a ruang cu Dalan thawng peknak ruang ah a si,” tiah a chim.

Chinram, Paletwa peng um Shinletwa SAC ralkap sakhan in a zaam mi SAC ralkap pawl cu Maraland Defense Force (MDF) nih an dawi hna i kaphnih in kahdohnak a chuah hnu ah SAC ralkap 6 hrawng an thi i ralkap 10 nak tlawm lo an tlaih hna kong Maraland Defense Force (MDF) nih an chim.

Shinletwa sakhan in a zaam mi SAC ralkap pawl cu January 5 zanlei suimilam 5:00 hrawngah Myanmar-India ramri hmun pakhat ah AA le MDF nih an kah hna, tiah theih a si.

SAC ralkap 200 deng an umnak Shinletwa sakhan cu AA le Maraland Defense Force (MDF) ṭangṭi phu nih January 2 ah a dihlak in an rak laak, tiah theih a si.

Be the first to comment

Leave a Reply

Your email address will not be published.


*