India Ram Ah A Zaammi SAC Ralkap 276 Cu Myanmar Ah Kuat Ṭhan An Si

January 17 ah Chinram, Paletwa peng in India ram ah a zaam mi SAC ralkap 276 cu Myanmar lei ah kuat ṭhan an si, tiah theih a si. SAC ralkap pawl cu Rakhine ramkulh chung kahdohnak hmun ah SAC nih an kuat ṭhan hna, tiah AA lei nih an langhter.
Paletwa peng sakhan kahdohnak ah India ram ah a zaam mi SAC ralkap 400 leng chung ah a tam deuh cu Rakhine ramkulh ralram ah an kal ṭhan tiin AA nih January 21 ah an thanh.
Paletwa peng kahdohnak ah SAC ralkap officer 36 le ralkap 240 hrawng cu January 17 ah India ram Mizoram ramkulh, Lawngtlai peng ah an rak zaam chap i, SAC ralkap pawl hi Rakhine ramkulh Sittwe khuapi ah an kir lai, tiah ṭuanvo ngeitu nih All India Radio News ah an chim. A luancia December 29 ah India le Myanmar ramri, Paletwa peng, Point 377 sakhan cu AA nih an rak laak i SAC ralkap 151 India ram ah an rak zaam. January 2 ah SAC ralkap 151 le January 9 ah SAC ralkap 104 cu Aizawl khuapi Lengpui vanlawng bual in Myanmar ram ah rak kuat ṭhan an si cang.
A luancia thla thum chung ah Sagaing ramṭhen, Chinram le Rakhine ramkulh ah SAC ralkap le dohthlennak hriamtlai phu kar kahdohnak ah India ram ah a zaammi SAC ralkap 600 leng an phan.

1 Comment

Leave a Reply

Your email address will not be published.


*