Mabein khua cu KIA nih an lak dih cang

Shan ramkulh chaklei, Mabein khuapi SAC ralkap sakhan le palik sakhan cu KIA nih an kah i an laak hnu ah Mabein khuapi cu a ningpi in KIA ralkap nih an uk khawh cang, tiah KIA thawng laaknak hrampi nih an chim. Nizan January 20, zinglei suimilam 5:00 hrawng in KIA ralkap nih Mabein khuapi chung SAC ralkap sakhan cheukhat le palik sakhan cu kah hram an thawk i SAC ralkap nih vanlawng in bomb lung 30 nak tlawm lo he kahdohnak an tuah nain KIA nih sakhan cu an laak khawh ṭhiam. Nihin January 21 ah SAC ralkap sakhan an laak ṭhan hnu ah Mabein khuapi palik sakhan um SAC ralkap nih an hriamnam an chiah i KIA nih Mabein khuapi cu a ningpi in an uk cang, tiah tualchung mi nih an chim.

KIA thawng laaknak hrampi pakhat nih cun, kahdohnak ah SAC ralkap thi mi le hliampu zong an tam, hmunram thianhfelnak an tuah lioah SAC ralkap ruak tam ngai hmuh a si, tiah an langhter. Mabein khuapi kahdohnak ah SAC ralkap nih vanlawng in bomb he kahdohnak an tuah ruang ah tualchung mi chung in thi le hliampu an um ve, tiah tualchung mi pakhat nih a chim.