Paletwa peng Sami ah kahdohnak a fak

Sami Khuapi In A Zaam Mi SAC Ralkap 200 Hrawng Le Chin Ralkap Kar Kahdohnak A Chuak tiah kan theih.
Chinram, Paletwa peng, Sami khuapi hrambunh Byuha sakhan in a zaam mi SAC ralkap 200 hrawng le Chin ralkap kar Matupi peng Lungpang khua le Sangtak khua kar ah fak ngaiin kahdohnak a chuak i SAC ralkap 15 nak tlawm lo an thih pinah tam ngai hliam an pu, tiah theih a si. Sami khuapi no.2 SAC ralkap sakhan cu Rakhine ralkap AA le ṭangṭi phu nih a luancia January 14 ah an rak laak i sakhan chuahtak in a zaam mi SAC ralkap 200 hrawng cu Matupi lei an kal lioah Chin ralkap CNA, CDF-Paletwa le CDF-Matupi nih Paletwa peng Bunglai khua pawng ah an kah hna. Cun, nizan January 20 ah Dilawngkone khua le Matupi peng Lungpang khua naih tiva pakhat ah Chin ralkap nih an kah ṭhan hna i minung 5 an thi. Cu pin ah, nihin January 21, zinglei suimilam 8:00 ah Matupi peng Lungpang khua le Sangtak khua kar ah kaphnih kar kahdohnak fak ngaiin a chuak ṭhan i SAC ralkap 10 nak tlawm lo an thi i tam ngai hliam an pu, tiah theih a si.
Lungpang le Sangtak khua kar kahdohnak a fah ruang ah Lungpang, Sangtak, Palaro, Belkhong le Vapung khua tualchung mi a tam-u cu a himnak hmun kawl in an zaam hna, tiah theih a si.

Be the first to comment

Leave a Reply

Your email address will not be published.


*