Ta Dar Oo vanlawng bualpi cu Urban Special Operation phu nih hriamngan in an kah

Mandalay khuapi Ta Dar Oo peng um SAC van ralkap sakhan pi cu lam hlat kahnak 107mm lung 5 in kan kah, tiah Urban Special Operation(USO) in ṭuanvo ngeitu nih Peopel’s Spring ah a chim. Ta Dar Oo vanlawng bual cu hriamngan lung 12 in kan kah i lung 7 hrawng cu a tlolh caah lung 5 lawng kan kah khawh. a tlolh mi hriamngan lung 7 cu kan chiah taak i SAC ralkap nih an laak, tiah a chim chap. Mizapi cung ah sualnak ṭha lo tuah dingin khua a khangtu SAC chungtel nih an ngeih mi innlo, thilri le anmah he pehtlaihnak a ngei mi hna zong faak piin kan doh hna lai tiin Urban Special Operation nih cun an langhter.
Ta Dar Oo vanlawng bual a kaptu PDF an umnak hmun cu SAC ralkap nih chekhlatnak an va tuah, tiah tualchung mi pakhat nih a chim. SAC kuttang telegram channel nih cun Ta Dar Oo vanlawng bual kahnak ah hmanmi 107mm cu SAC ralkap nih an laak, tiah an thanh ve. 2023 February 9 zan zong ah Ta Dar Oo vanlawng sakhan cu 90mm hriamngan in PDF nih an rak kah bal cang. Ta Dar Oo vanlawng bual cu SAC nih tlangcung miphun, dohthlennak hriamtlai phu le sualnak ngei lo mizapi kahdohnak ah an hmanmi hmun le vanlawng a ṭum kainak a si.

Be the first to comment

Leave a Reply

Your email address will not be published.


*