Mizoram Chin Ralzam Cu ‘Illegal Migrants’ Tiah ACCJSU Nih Auh! Joint Hnampual Nih An Dohkalh Colh

Aizawl Khuapi College Siangngakchia Hruaitu Bu, Aizawl City College Joint Students’ Union(ACCJSU) nih Chin ralzam hna cu “Illegal Migrants” tiah an auh ruangah Joint Hnampual Students Organisation nih dohkalhnak cathanh an chuah. Aizawl City College Joint Students’ Union(ACCJSU) nih press conference an ngeihnak ah Myanmar lei in a rak lut mi Chin ralzam hna cu “Illegal Migrants” tiin an auh hna pinah Mizoram chung i Myanmar ralzam vialte renghnak phunglam tuah ding in an duhnak an langhter. Cu lawng siloin Myanmar ralzam hna kut in Mizoram mi pakhat nunnak a liam ṭhan sual a si ahcun Myanmar ram i kuat ṭhan a si khawh nakhnga anmah hrimhrim nih Central cozahpi ton an timh kong an chim.
ACCJSU nih Chin ralzam “illegal Migrants” tiah an kawh-auh mi cu a ruahzia an thiam lo pinah Mizoram cozah le NGO ngan pipi zong nih an hman duh lo mi biafang a si, tiah Joint Hnampual Students’ Organisation nih cathanh an chuah ve. ACCJSU cu unau funtumnak lam hrawk kho ding i cawlcang ti lo ding in an theihter hna. Nawlngeihnak laak ruang ah Myanmar ram buai hnu in Mizoram ah Chin ralzam an karh i, Myanmar lei mi sin in Mizoram chung ah phungbuarnak, rithaisii zuar le thawhnawnnak zong a karh ve tikah social media ah Myanmar lei mi mawhchiatnak le remlonak a karh i, ACCJSU zong nih atu bantuk in Myanmar lei in a lut mi ralzam hna renghnak phunglam tuah ding in cozah sinah nawlnak an tuah. Mizoram mizapi lakah Chin ralzam a dawtu an um bantuk in a remlotu zong an karh i, siangngakchia bu ciocio zong an hmuh ning le ruah ning aa dang pah cang, tiah ruah khawh a si.

Be the first to comment

Leave a Reply

Your email address will not be published.


*