Paletwa in a zaam mi SAC ralkap nih Matupi peng khuate pahnih ah thilri tampi an fir

Paletwa peng in a zaam mi SAC ralkap pawl cu Matupi peng Lungpang khua le Sangtak khua ah an lut i khua mi hna thilri tampi an fir, tiah Matupi Peng Mizapi Ukhruainak Phu nih an thanh. A luancia January 20 zinglei suimilam 10:00 hrawngah Matupi peng Lungpang khua ah SAC ralkap pawl cu an lut i vok 10, meheh 3 le ar tampi an thah. Khua mi cycle 8 le solar tampi zong an hrawhpiak hna, tiah an langhter. January 21 ah Sangtak khua ah an lut ṭhan i khua mi hna vok le an ar cu an thah i an eipiak ṭhan hna. Khua mi nih an i ngeih mi siikhan chung um solar 4, battery, Coolbox 1 zong an hrawh pin ah sii-ai a um mi dihlak an khanghpiak hna, tiah Matupi Peng Mizapi Ukhruainak Phu nih cun an langhter. Paletwa peng in a zaam mi SAC ralkap le CDF Matupi, CDF Paletwa le CNA cu January 20 le 21 ah an rak i kap i, SAC lei in ralkap 10 an thi.
Kyauktaw, Myo Oo le Minbya Khuapi cu AA nih an uk cang
Rakhine ramkulh Kyauktaw, Myo Oo le Minbya khuapi um SAC ralkap sakhan dihlak cu AA nih an laak i khuapi cu an uk cang, tiah AA he naihniam in a um mi nih an chim. Minbya khuapi ah AA nih an laak rih lo mi SAC ralkap sakhan Khah Mah Yah 379 cu February 5 ah AA nih an laak. Myo Oo khuapi um Khah Mah Yah 375 sakhan zong February 7 zan ah a dihlak in an laak i Myo Oo sakhan um SAC ralkap officer telh in ralkap 100 leng an tlaih hna, tiah theih a si. Kyauktaw khuapi kahdohnak ah SAC ralkap tilawng pathum cu Kaladan tiva thluan in an kir i AA nih an kah caah tilawng pahnih cu ti chung ah a pil, tiah Border News Agency-BNA le Arakan Bay News( AB News) nih an langhter. AA nih Paletwa peng dihlak le Rakhine ramkulh khuapi 5 cu an laak i an uk cang. Cu pin ah Maungtaw peng um Taungpyu khua zong an laak i a dang SAC ralkap sakhan zong an kah cuahmah lio a si, tiah theih a si.

1 Comment

Leave a Reply

Your email address will not be published.


*