Kachin ralzam 30,000 deng cu an inn an fuh than cang

Hpakant Ralhrial Minung 30,000 Deng Nih Anmah Innlo An Panh Ṭhan Cang tiah 10 February 2024 ah kan theih. Kachin ramkulh, Hpakant peng kahdohnak ruangah ralhrial in a zaam mi hna chung in minung 30,000 deng cu Hpakant mibawmchantu phu bawmhnak thawng in February 9 ah an innlo an panh kho cang, tiah theih a si.
Ralhrial mi hna hi Hpakant khuapi Lonekhin le Saitaung phungki biakinn le khrihfa biakinn ah aa dor mi an si i February 9 zinglei ah an innlo an panh ṭhan cang hna, tiah mi bawmchantu phu in ṭuanvo ngeitu pakhat nih RFA ah a chim. A ruang tampi ruang ah innlo a panh kho rih lo mi ralhrial mi cheukhat zong an um rih bantuk in Tarmakhan lei kap ah a zaam i innlo a panh kho rih lo mi zong an tampi, tiah a chim chap.
A luancia January 6 lio zong ah Hpakant khuapi luhnak ah a um mi SAC ralkap sakhan pahnih cu KIA le ṭangṭi phu hna nih an rak kah i SAC ralkap nih vanlawng le hriamngan hmang in kahdohnak an tuah ve caah tualchung mi 30,000 deng cu Hpakant khuapi in an rak zaam. UNOCHA nih an langhter ning ah SAC nih nawlngeihnak an laak hnu in Myanmar ramchung ah ralhrial mi nuai 2.6 leng an phan cang.

Be the first to comment

Leave a Reply

Your email address will not be published.


*