Lashio khuapi luhnak lampi SAC ralkap nih anhrawk dih hna

SAC ralkap nih Lashio khuapi ah ralkap thazaang a thong renglo a chap hnu in Lashio khuapi cu TNLA nih a kulh bak in an kulh caah khuapi luhnak lampi vialte JCB in an cawh i an hrawk dih tiah an langhter.
SAC ralkap nih cun Lahsio le Muse kalnak lampi, Lasho Nanmah Ttu lam, Nanmah Ttu – Tipaw lampi , Mine Lung – Mukoh lampi, cun June 13 ni zong ah Lahsio khuapi luh khawhnak lampi pakhat zong JCB in an cawh i an hrawk dih tthan caah mawtaw hrimhrim an kal kho ti lo tiah an langhter.
June 12 ni ah khan Lashio kiangkap khuapi kalnak lam hna cu SAC ralkap nih JCB in an cawh i an hrawk dih hna. Hihi dothleng ralkap pawl kan kham hna tiah an ruah men lai, hi thil ruangah ah thilman a kai, thil a lut kho ti loin tualchung mipi harsatnak an tong i a tuar tu taktak cu mipi an si tiah TNLA nih an langhter.
Lashio khuapi kiangkap SAC ralkap an umlonak hmun vialte ah TNLA nih hmunhma an lak dih ve cang i Lashio khuapi chung ah kahdohnak a chuah lai phan ruangah tualchung mi cheukhat cu innlo chuah tak in an zaam hna tiah tualchung thawnghram nih an langhter.
Operation 1027 lio ah Shan ram chaklei ah camp tamtuk a sung mi Min Aung Hlaing nih ralkong he pehtlaiin a pakhatnak le abiapi ah a ruah mi cu Shan ram chaklei hmunhma lak tthan hi a si tiah ramkhel thiamsang hna nih an langhter.
SAC ralkap nihhin Shanram chaklei ah ralthawh ai timh caah tuan deuh pi khan ralkap thazang le hriamnam a rak chap lengmang cang. Tuluk sin ah cawk mi cinthlaknak ah an hman mi Drone 400 renglo le bomb 1000 renglo zong voi khat kuat bak ah Lashio ah a kuat cang hna tiah theih a si.

Be the first to comment

Leave a Reply

Your email address will not be published.


*