Matupi ralhrang pawl cu CB nih an kah hna

Chin ramkulh Matupi khuapi lak kahdohnak atuahtu hi phu hnih an si tiah theih a si.
CDF-Matupi Brigade 1 ho in phu khat le CDF-matupi Brigade 2 le ttangtti phu tiin phu hnih nih ralhrang camp lak an i zuam tiah theih a si. Cu kahdohnak ahcun dothleng ralkap leiin siseh, ralhrang lei zong in a thi le hliamtuar an um tiah theih a si.
Operation CB min bunh in Matupi khua chung kahdohnak ah dothleng ralkap nih Palik camp le GAD inn kan lak khawh tiah nizaan ah Chin Brotherhood nih an langhter.
Kahdohnak hi Yaw Army le kan hawilei dang he kan tuah mi a si tiah an langhter. Hi kong he pehtlaiin People’s Spring nih CDF-Matupi biaphuang tu interview an tuahnak ah an hal chih nain min langhter a ngah rih lo tiah a leh hna. Asinain CDF thawnghram pakhat nih cun AA ho in kahdohnak hi an tuah tiah a chim. Cun Rakhine media pakhat zong nih Matupi kahdohnak ah AA an i tel tiah a feh ter ve.
Matupi khuapi chung kahdohnak ah CDF-matupi Brigade 1 in kum 21 upa Salai Lai Thang Boi nunnak a liam i, CDF-Matupi Brigade 2 in minung pakhat hliam a tuar tiah theih a si.
Dothleng ralkap nih Matupi khuapi chung Palik camp an va kah ahhin ralhrang ralkap aho hmanh an um ti lo, cun GAD inn zongah an um ti lo. Khuapi an chuah tak i khua leng deuh ah a um mi an camp pi ah an i fonh dih cang. cu ka ahcun ralhrang pawl cu an dil bak in an i dil hna tiah CDF thawnghram pakhat sin in kan theih.
Matupi khuapi ahhin SAC ralkap battallion 3 an um hna, cu hna lak ah SAC ralkap No. 304 Light Infantry Battallion camp hi Chin Brotherhood, AA le ttangtti phu nih an kah hna, cun Kohkun kam ah a um mi ralhrang camp le an camp lian bik Byo Ha Kung hi CDF-Matupi Brigade 2, CNA, CDF-Lautu, CDF-Hualngoram, CDF-paletwa, le CDF-Mara i bawm in an phomh ve cuahmah hna lio a si tiah thawnghram pakhat nih a langhter.An camp pi bik pawngkam ahhin mine bomb tampi an do caah bomb lam sualnak in CDF-Matupi Brigade 2 ralkap pakhat hliam a tuar hi a si tiah theih a si.

Be the first to comment

Leave a Reply

Your email address will not be published.


*