Zeiruang Ah Joshua Van Aa Ṭhuat Khawh Lo

Thaizing zarhpi ni zingka teah Joshua Van le Dagestan fighter Ulanbekov hna cu i ṭhua ding an si nain UFC lei nih Joshua le Ulanbekov i ṭhua ding cu a tlamtlin lo kong an thanh ṭhan.Kaphnih lei in i ṭhua ding in a thlathla timhtuahnak an ngei nain an i ṭhuat hlan nikhat ah fighter hna nih a biapi bik tuah ding mi an ngei. Cucu khingthlai(Weight-in) a si. Cu khingthlainak ah cun fighter vialte nih, an i ṭhuatnak ding division nih a khiah mi khing an tlin dih a hau. Joshua aa ṭhuatnak hi Flyweight division a si i hi division ah aa ṭhua ding mi cu an khing 125 lbs an si a hau i, title fight a si lo mi ahcun a tam bik 126 tiang an si kho.
UFC fighter pawl hi a tam deuh cu an i ṭhuatnak ding khing nakin an rit dih hna i khingthlai lai ah an khing an thlak(ṭhumh) tawn. Cheukhat cu a rih tuk caah khing ṭhumh an i harh i, an ngandamnak tiang a hnursuan mi zong an um tawn.
Tutan Johsua he aa ṭhua ding mi, Dagestan fighter zong hi 125 lbs tiang a khing ṭhumh ding a si nain 129.5 tiang lawng a ṭhumh khawh. Cucu aa ṭhuat khawhnak khing nakin 3.5 lbs in a rit deuh.
UFC hi One Championship bantuk in khing aa khat lo mi ṭhuatter(catchweight) a duh lo ngai mi an si i, a biapi taktak mi lawng ah fighter hlawh ding zuhpiak in an ṭhuatter hna. Joshua nih hin ṭhuatpi ding in a cohlan ko men lai nain UFC lei nih a cohlan lo ahcun i ṭhuat khawhnak lam a um ti lo.Tutan hi Joshua ca ah a voi linak(4) an hnon(cancel) a si cang. April thla ah Locas Rocha he i ṭhua ding an si nain a tlamtling lo i, June 1 ah Sumudaerji he timhtuah ṭhan an si, cu zong a tlamtling lo. Cu hnu ah June 1 ṭhiam ah khan thaizing main event i aa ṭhua ding mi Tatsuro Taira he hin timhtuah an rak si nain UFC lei nih an thlennawn ṭhan i atutan Tagir Ulanbekov he hin a voi linak aa ṭhuat ding hnon(fight cancel) a si.

Be the first to comment

Leave a Reply

Your email address will not be published.


*