Gaza ram thlanglei Rafah khuapi kahdohnak ah Hamas bomb in Israel ralkap minung 8 an nunnak a liam tiah IDF nih official in an langhter. Israe nih Hamas pawl an tthawnnak bik hmun ah an ruah mi Rafah khuapi kahdohnak ah Hamas kut in Israel ralkap minung 8 bak an nunnak a liam. Zarhte ni kahdohnak nunnak a liam mi Israel ralkap hna hi, Hamas nih hin mine bomb in maw an doh hna, asiloah Anti Tank missile in dah an kah hna timi hi fiang in an langhter kho lo.
Kan nunnak hmanh kan sung kho timi an theih buin kan ram caah an nunnak in rai an thawi taktak, Upatnak ka pek hna i an chungkhar hna he zong i kup in an ngaihchiatnak ah kan tuarpi hna tiah Israel ramdang vuanci Israel Katz nih a langhter.
January thla zong ah khan Israel ralkap minung 21 nunnak a rak liam cang, cucaah Hamas ralkap Rafah Brigade hi kan tei hrimhrim hna a hau i, cu cu kan tuah cuahmah mi hi a si tiah Israel ralkap biaphuangtu Daniel Hagari nih a chim ve. Hi thilcang ruangah hin Israel ram hruaitu Prime Minister Benjamin Netanyahu cu minung tampi nih duhlonak lam an zawh hnawh. Nikhat kahdohnak hmanh ah hi zat an thih ahcun, thaizing le kip ah teh zei zat remruam dek thi ve te hnga, hi cozah hi thlak hmasa phawt a hau ko tiah an langhter.
Asinain PM Benjamin Netanyahu nih cun tuchun ah kan ram kan vennak ah lungfah ngaihchiatnak he a man kan pek tthan, lungfah ngaichiat mithli tla buin kan ram mizapi hna he kan pasalttha hna ttahnak ah ka lu kai khun i ka ttah hna he tiah a ngaihchiatnak a langhter. Isreal cu Gaza ram Hamas ralhrang a doh hna ruangah Vawlei cung ram tampi nih an huat hlei ah a si khawh chung in hremnak pek an duh. Cun anmah ram chung lila zongah Hamas an doh hna ning ah an uar ti hna lo in duhlonak an langhter thluahmah cang. Hi kong he pehtlaiin Italy PM Giorgia Meloni nih cun Israel cu Hamas nih an do mi rap nih a awh, mah te lawng i erh khumhnak rap an do mi nih a awh i, cu rap cu a nung mi a lo tiah a chim ve.
Israel nih Gaza ram kahdohnak ah a pehzulh peng ko, Gaza ram hi minung a dil bak in an i dilnak hmun a si caah Israel ni bomb a va thlak poh ah tualchung mi a thi le hliamtuar an um peng tiah anmah Palestine nawlngeitu nih an langhter. Cucu Vawlei cung pumpi theih in a thang i, Israel nih civil mi tampi a thah cang hna tiah anmawhchiat nak hi a si. Palestine ngandamnak hi a thi le hliamtuar zat an thanh mi kongah aho hmanh nih an fehternak kong an langhter bal lo, asinain chekhlatnak an tuah cang hna i, New York Time nih cun Hamas ralkap a thi mi le mi sawhsawh a thimi zong thleidang loin tualchung mi an thi tiah an langhter tiin a soisel hnanak hmuh khawh a si.
Leave a Reply