Nyaungshwe Kahdohnak Ah A Thi Mi SAC 40 Leng Ruak Cu PDF Nih An Vui Hna

Shan ramkul, Nyaungshwe peng kahdohnak ah a thi mi SAC ralhrang 40 leng ruak cu thla 3 deng a rau cang nain SAC ralhrang nih an rak laak hna lo caah PDF nih nizan 2024, June 16 ah an vuipiak hna kong, Bees Column nih an langhter.

A luancia April 13 ah Nyaungshwe peng, Nyaunglebin khua le Yaepu khua kar ah tualchung hriamtlai phu hna le SAC ralhrang kar kahdohnak ah a thi mi SAC ralhrang pawl ruak cu thla 3 tluk a rau cang nain SAC ralhrang nih an rak laak hna lo ruang ah PDF nih atu bantuk in an vui hna hi a si.

“Anmah zong minung an si ko nain an bawi le nih zei ah an rel hna lo, a thi mi SAC ralhrang pawl ca ah lung a ṭha lo ngai, thla 2 leng a rau cang nain SAC ralhrang nih an ruak an rak laak hna lo ruang ah PDF ṭangṭi phu hna nih kan vuipiak hna” tiah Bees Column in ṭuanvo ngeitu pakhat nih a chim. Kap 2 kar kahdohnak ahcun SAC ralhrang 40 leng an thi, tiah theih a si.