Yangon Ah Urban Guerrilla Hriamtlai In Mino Cheukhat Cu SAC Ralhrang Nih An Tlaih Ṭhan Hna tiah kan theih.
Yangon khuapi, Thanlyin hleidonh hunnak tuah lio ah thal bomb (Shock missile) in kah a timtu minung 9 tlaih khih an si hnu in anmah he aa pehtlai mi a dang Urban Guerrilla hriamtlai phu chungtel mino 4 zong kan tlaih ṭhan hna, tiah SAC ralhrang nih nihin 2024, June 17 ah an thanh.
Tlaih a tong mi minung 9 hna sin in hlathlainak kan tuah hnu ah kum 21 in kum 34 karlak mino hna Dark Shadow Urban Guerrilla hriamtlai phu chungtel Ko Myo Thein Tun, Ko Htet, Ko Ye Zaw Tun le Ko Shin Myint Mor Aung hna cu June 14 ah kan tlaih khawh ṭhan hna, tiah SAC ralhrang nih an langhter.
Atu tlaih a tong mi hna hi Yangon ramṭhen, Mingala Taungnyunt le Hlaingthaya peng chung hna ah puahkehnak voi 2 tiang a tuahtu an si, tiah SAC ralhrang nihcun an puh hna. SAC ralhrang nih an langhter mi hmanthlak ahcun tlaih a tong mi Ko Ye Zaw Tun hi a hmai ah hremnak hma he hmuh a si.
Leave a Reply