Hamas ralkap 500 renglo kan thah hna tiah Israel nih langhter

Israel nih Rafah khuapi le a pawngkam hrawng cu May thla khan a luh hnawh cang i ni khat zong hrelh loin kahdohnak an tuah. Cu kahdohnak ahcun Hamas ralkap minung 500 renglo kan thah cang hna i, leitang khua an cawh mi 230 tluk kan hrawk piak dih hna tiah an langhter.

Rafah khuapi kahdohnak ahhin Israel ralkap nih cun Hamas nih an tlaih mi hna zong zei maw zat an chanhchuah khawh hna. Asinain minung a dil bak in an i dilnak hmun a si caah civil mi zong tam ialte an thi ve tiah UN nih a langhter mi ning in theih khawh a si. Rafah hmunram in zarh 6 chungah hmundang ah ai tthial mi hi minung 1.3 million an si lai tiah UN nih cun an langhter chap.

Gaza ram ah mangttam tlung ding dirhmun ah a si cang caah Israel nih nichiar tein caan zei maw zat chung kahdohnak tuahloin kan um lai i, cu chung ahcun bawmhnak luhter a si lai tiah an thanh. Nizan nai ah khan thlanglei Gaza ah bawmhnak lut kho loin a kham tu Israel ralkap Brigade pakhat cu US cozah nih phihkharnak a van tuah colh hna. Cu hnu ah Israel nih bawmhnak lut kho ding in hma an lak colh nak hi a si.