India-Myanmar Ramri Ah Myanmar Ralzaam 4 Nih Bomb An I Lamhsual I Minung 1 Nunnak A Liam

Sagaing ramṭhen, Temu peng chaklei India-Myanmar ramri ah Myanmar ralzaam mino 4 nih 2024, June 16 ah bomb an i lamhsual i Pa Thang Min Len cu bomb pelpawi nih a khen caah a nunnak a liam, tiah theih a si.

“Chun suimilam 2:00 hrawng ah caw a cawng mi Myanmar ralzaam mino 4 nih an tlunlei ah bomb an i lamhsual ruang ah minung 1 nunnak a liam i minung 3 nih hliam an tuar, hliam a tuar mi hna cu an thlopbul cuahmah hna lio a si, India-Myanmar ramri Myanmar ramchung ah a si, mah bomb hi mi zei phu nih dah an hmanh timi cu theih a si rih lo” tiah anmah he naihniam pakhat nih a chim.

Atu bantuk in bomb aa lamhsual mi hna hi Tamu peng, Hpaiyan khua mi an si i kahdohnak ruang ah Manipur ramkulh chung ah ralzaam in aa dor mi an si, tiah theih a si.

“Myanmar ralzaam hna nih hin Myanmar ramchung ah caw le naa an va zoh tawn hna i atu le tu ti awk in bomb lamhsualnak a um lengmang, atu tan he cun a voi 4nak a si cang” tiah anmah he naihniam pakhat nihcun a chimchap.