Matupi Kahdohnak ah CDF-Matupi Ralkap 5 nih Nunnak an Pek tiah kan theih.
Matupi SAC ralkap sakhaan laak kahdohnak ah CDF-Matupi Brigade (1) in ralkap panga nih an nunnak an pek, tiah theih a si.
Matupi khuachung i SAC ralkap hmunkhuarnak pawl cu Chin Unau Phu, AA le Yaw Army (YA) nih June 9 in doh hram an thawk i, penguk zung, palik sakhaan le Kha La Ya (304) hi an laak khawh cang.
June 14 in 17 ah a cang mi Kha La Ya (304) SAC ralkap sakhaan kahdohnak ah CDF-Matupi Brigade (1) in ralkap panga nih an nunnak an pek hi a si.
Kahdohnak ah a thi mi CDF-Matupi ralkap pawl cu Salai Bawia, Salai Robert San, Salai Pa Tu, Salai Sui Lian le Salai Lai Thang Bawi hna hi an si.
Tedim peng, Kenedy tlang cung ah a um mi sakhaan cu nihin zinglei ah khan SAC ralkap nih Chin Unau Phu chungtel PDF-Zoland kut in an laak ṭhan, tiah theih a si.
Tedim tualchungmi pakhat nih, “Kap hnih kahdohnak thawngpang tlawmpal telawng kan theih. Kenedy tlang sakhaan cu nihin zinglei ah khan SAC ralkap nih an laak ṭhan cang,” tiah a chim.
June 16 ah khan Tedim khua in SAC ralkap thazaang 100 cu Kenedy tlang lei ah ral lam an sial i, nihin June 18 ah an laak khawh hi a si.
2023 November 21 ah khan PDF-Zoland nih Kenedy tlang i SAC ralkap sakhaan hi an rak laak mi a si i, thla 6 hnu ah SAC ralkap nih an chuh khawh ṭhan hna hi a si.
Leave a Reply