Matupi kahdohnak ah CDF pakhat nunnak liam tthan tiah kan theih.
Matupi khuapi chung hmunhma a la mi SAC ralkap le Chin Brotherhood kahdohnak ah Chin Brotherhood chungtel a simi CDF-Matupi Brigade 1 in ralkap pakhat nunnak a liam tthan tiah theih a si.
Matupi khuapi chung kahdohnak ah CDF-matupi Brigade 1 ralkap Salai Robert San nunnak a liam tiah June 17 ni ah an langhter.
June 16 ni ah Matupi khuapi chung ah dothlennak atuahtu ralkap le SAC ralkap karlak ah kahdohnak a chuak i, cu kahdohnak ahcun SAC ralkap Major Awng Tu Sing telh in ralkap minung 4 an thi tiah SAC ralkap thawnghram nih an langhter.
Major Aung Tu Sing hi kum 2021 lio Matupi kahdohnak ah khan hliam a rak tuar, cu hnu June 16 ni kahdohnak ah atu bantuk in a liam hi a si tiah ralkap thawnghram nih cun a langhter chap.
Matupi kahdohnak ahhin CDF-Matupi Brigade 1 in ralkap pakhat a thih tthan caah, kahdohnak an thok in tuni tiangah minung 4 nunnak a liam cang tiah theih a si.
Leave a Reply