Mindat Khua Mipi 80% Hrawng Nih Innlo An Zaamtak

Chin ramkulh, Tedim khuachung mipi 80% hrawng nih innlo an zaamtak i a tam deuh hi tu thla in zaam hram an thawk hna tiah Mindat peng ralzaam bawmhnak Committee sin in thawng theih a si. Mindat khuachung ah milu 35,000 hrawng an um i cu chung ah 20% lawng khuachung ah an tang cang i 80% hrawng hi hmunkip ah an zaam hna tiah theih a si.

Mindat khuachung ah kahdohnak a chuak lai timi thawngpang ruang ah khuami tam deuh cu tu thla thawk in an zaam hna hi a si.

Mindat khuachung lawng ah siloin Mindat khua in meng 3 hrawng aa hlatnak Pan-oh khua telh in khuate 7 hrawng hi vanlei kahdohnak fak pi in an tuar caah khua ning in an zaam hna tiah theih a si. Mindat khuachung mipi le a pawngkam khuate in mipi pawl cu Mindat peng chung khuate dang pawl, ramlak le lo hna ah thlam sak in an zaam hna, cheukhat hi Magway ramṭhen le Yangon, Mandalay lei hna ah an zaam hna tiah ralzaam bawmnak phu pawl sin in theih a si. Matupi khuachung kahdohnak pawl ruang ah Matupi khuachung mipi tampi hna cu Mindat peng ah ralzaam ding in an rak phan hna tiah theih a si fawn.

Hramhram in uknak lak a si hnu kum 3 leng caan chung, March thla tiang cazin ning ah Mindat peng chung ah ralzaam 10,500 hrawng an um. Fur caan a phanh cang lai caah ralzaam pawl nih dornak inn le buk pawl an i zat lo leng ah ruah khamnak le nifatin eidin an herh hringhran tiah theih a si. Mindat peng, khuate pawl ah ralzaam dirhmun a phan mi hna nih bawmhnak nan herh ahcun sang, khua upa le IDP lei ṭuanvo ngeitu pawl sin ah bawmhnak hal khawh a si tiah Mindat peng mipi uknak phu nih an thanh.