Mindat Khuapi Tualchung Mi Zatuak 80 Cu Innlo Chuahtak In Ral An Hrial

Chin ramkulh, Mindat khuapi in tualchung mi zatuak 80 cu innlo chuahtak in ral an hrial hna i mah lak ah a tam deuh cu atu June thla chung ah ral an hrial hna, tiah Mindat peng ralzaam tawlreltu Committee sin in theih a si.

Mindat khuapi ah minung 35,000 tluk khua an sa i cu chung ah zatuak 20 lawng khuapi chung ah an taang, zatuak 80 cu hmun kip ah ral an hrial hna, tiah an langhter.

“Mindat khuapi chung ah zatuak 20 lawng an taang cang, kum upa cang mi hna le zaamnak ding ca ah harsatnak a ngei mi hna lawng an taang, cheukhat tu cu an zeihmanh poi lo, kan um ko lai an ti, kan cung ah thil a cang mi paoh kan tuar ko lai an ti, Mindat khuapi in chuah ding zong ah tangka dih mi a tam ngaingai” tiah Mindat peng ralzaam tawlreltu Committee in Pa Lawrence nih a chim.

Atu lio cu Mindat khuapi pawng um Panawh khua telh in khuate 7 hrawng cu SAC ralhrang nih cunglei kahdohnak faak ngai in a tuah mi ruang ah khua chuahtak in ral an hrial hna, tiah theih a si.