Myanmar ram telh in Asia ramchung hrambunh Online phaisa hlen hmang mi hna nih Vawlei cung ram vialte nih an zoh cho mi US ram an i target i minung tamtuk an hlen cang hna, cu hna lak ahcun mah le mah ai that mi zong an um cang tiah CNN nih a langhter.
Kum 82 ni Dennis Jones cu facebook in Jessie timi nu he an i thei i, caan zei maw zat chung online in an komh hnu ah Jessie nih cun Online phaisa tiah a min a thang mi Crytocurrency Website pakhat ah investment tuah a fial. Cutikah Dennis zong nih cu mah le ngaihzawng deuh mi nih rian van fial hrat ahcun a phaisa ngeih mi dih ngawt in a chuah i cu website phaisa thunnak ahcun a thun dih.
Cu ti a thun dih tlawmpal in a phaisa cu hmuh ding a um ti lo in Jessie zong cu pehtlaih awk a ttha ti lo. Cucaah tarpa Dennis Jones cu a lung a rawk tuk i amah le mah ai that tiah CNN nih cun a langhter.
Targpa Dennis Jone hi online in phaisa hlen a tong mi American mi tamtpi lak ah pakhat a si i, Myanmar telh in Southeast Asia ram hrambunh in Tuluk pawl nih an tuah mi Online phaisa hlenhmang mi hna nih an hlen mi relcawklo minung lak ah pakhat a si ve.
Kum 2023 chung lawngah US rammi sin in US dollar 4 billion an hlen hna i, kum 2022 lio nak in 53% tluk a sang deuh ti a si. Hi hnu zongah US rammi hna cu hi nak fak hmanh hlen an si zumh a si i, vawlei cung pumpi in online phaisa hlen hmang mi hna ruangah mi nunnak tamtuk a rawk cang tiah an langhter.
Hi bantuk in online in mi a hlengtu hna hi anmah lila zong hlen an tong i hramhram in mi an hlenter hna tiah CNN nih cun a langhter. India ram mi Rakhesh cu kum 2022 lio ah khan Thailand ram ah Technology he pehtlaiin rian a sok i a va kal. Asinian an rak hlen caah online phaisa hlen hman hna sin ah an kuat i online i hlen rian an ttuan ter. Anih hin Russia ram Business man minthang Klara Semonov bantuk in thla 11 chung online in lem a cang i, mi a hlen rian a ttuan mi a si.
Asinain kum 2023 ah khan a sachoh a dih caah ttha tein an thlah tthan hnu ah atubantuk in a konglam tawi a chim hi a si.
Hi bantuk in an tlaih mi hna hi hramhram in tlaih mi an si caah lengchuah zong an sianh hna lo i, mi an hlen khawh hna lo ahcun a phunphu in an hrem hna i sal bantuk in an tuah hna nak kong Rakesh nih cun a chim. Hi hna pawl hi Thailand cozah nih Wireless internet poh an phih kanh ko hna nain Starlink tibantuk, internet dang an hman khawh tthiamtthiam tiah an langhter.
Online phaisa hlen rian a ttuan tertu hna cu a tlangpi in Tuluk mi phun lawngte an si i, Myanmar ram chun Shan ram ah hram an rak bunh hna, asinain TNLA, MNDDA le AA nih biatak tein kahdohnak an tuah i cu hna pawl he ai pehtlai mi ralhrang zong an dawi hna hlei ah mitampi tuk an tlaih khawh hna. Cun Tuluk tlonh nak ah SAC ralkap zong nih an tlaih ve hna i, Tuluk nawlngeitu sin ah an pek hna. Cu hnu ah Karen ram Myawaddy khuapi lei ah an i tthial tthan i SAC ralkap kuttang BGF nih security an lak piak hna i zalong ngai in mi hlen rian an ttuan cuahmah ko rih. Cu hmun in a zaam kho mi Myanmar mi pakhat nih cun Tuluk boss pawl nih cun inn dot tampi le lian pipi an sak thluahmah i cun inn lian pipi chung ah a khat bak in an um i, online in heh tiah mi an hlen ter hna nak kong VOA nih interview an tuahnak ah a rak chim.
Leave a Reply