Tayawady peng Ni 4 chung kahdohnak ah ralhrang 18 thi

June 12 in 15 ni tiang Tayawady district, Bago U Ma ah rallam a sial mi SAC ralkap minung 90 hrawng cu dothlennak atuah tu ralkap hna nih ni 4 chung bak pehtlai in an rak phom hna tiah theih a si.

Kahdohnak ahhin PDF nih SAC ralkap hna cu an kalnak ding lam poh in an rak bawh hna i mine bomb le hriamngan zong in heh tiah an kah ve hna caah ralhrang minung 18 an thi, a dang minung 10 hliam an tuar, asinain YOMA (GBK) pasalttha pakhat nunnak a liam ve tiah Tayawady PDF in ttuanvo ngeitu pakhat nih a langhter.

Hi bantuk in nili chung bak SAC ralkap pawl pehtlaiin a kaptu hna cu Tayawady PDF, Nat Ta Lin peng Local PDF, YOMA (GBK), le PDF fonh hna an si tiah theih a si.

Cun Nat Ta Lin peng chung ah PDF hna thawngpang a thlattu pa cu PDF nih a inn ah an va fuh i an tlaih hnu ah an thah tiah theih a si.

June 16 ni zaan sml 10 tluk ah Nat Ta Lin peng Ma Ci Pin Awng Tu Khah khua ah a um i SAC ralkap caah rian a ttuantu Khin Mawng The timi pa cu Phoenix DF nih an inn ah an luh hnawh i an tlaih. Cu hnu ah SAC ralkap he an i pehtlaihnak thilri tette ttha tein hmuh a si caah an kah colh tiah Phoenix DF in ttuanvo ngeitu pakhat nih a chim.

Hi pa nihhin PDF thawngpang ahlat i SAC ralkap sin ah a pek lawng siloin ralkap thar caah mino a kawl hna, cun mi phone kip zong VPN an hman le hmanlo tiang in a chek hna i a phuphun in mizapi harsatnak a pek hna caah atu bantuk in an kah nak hi a si tiah an langhter.