Calvary Khrihfa Bu Nih Chinland Council Sinah Bawmhnak Pek

Calvary Khrihfa Bu hi Central Lairam Lawngtlai khuachung LIKBK local Khrihfa bu ah Laiholh hmang chun te an si.

Calvary Khrihfabu hi kum 1990 ah Myanmar rammi sinak aa tlaih i, Mizoram ah a phanmi Laimi tampi cu rak thawldawi an si caah, Calvary Khrihfabu Dirhtu Pu Z Ni Tling zong hi kum 1980 in 1990 tiang hi Mara Autonomous District Council ram Saiha ah a rak um Ralzaam mi thawl an si tikah kum 1990 ah Lai Autonomous District Council hmunpi Lawngtlai khua ah a rak i țhial. Cu hnu kum 1992 ah Calvary Khrihfabu cu Lawngtlai L-4 sang Pu Z Ni Tling inn ah amah hruainak in dirh a si.

*Calvary Khrihfa bu Assembly i an i pehnak* Calvary Khrihfabu dirhtu le chungtel hna cu ralzaam deuhmi an rak si caah an za a long lo ngaingai. Harnak tampi an tong cucaah kum 1992 Tho thla Bial khawmpi ah chungtel sinak an rak hal. Nan tangah kan um lai i, kanmah miphun holh *Laiholh* in Pathian thangthatnak kan ngei lai tiah an rak ti hna i, Assembly nih an rak cohlan piak hna. Assembly tang i an um caah nihin tiang Pastor an ngei lo, Assembly nih Bial Pastor a chiahpiakmi hna nih an zohkhenh hna. Assembly tang um an si caah rethei taktak in an rak sakmi Biakinn zong Assembly ta a si.

Mah miphun Laiholh in Pathian thangthat ruang ah harnak tampi a rak tongmi Khrihfa bu an rak si. Nihin tiang pehzulh in mah miphun holh Laiholh in Pathian an thangthat.