Matupi ah Chin hriamtlai phu karlak kahdohnak ah kaphnih nih cathanh an chuah

Matupi khuapi ralhrang camp pakhat cu CB, AA le ttangtti phu nih tlamtling tein an lak khawh cang i Howitzer miakpi telh in hriamnam zei maw zat an lak khawh nak kong le kahdohnak ah CDF-Matupi Brigade 1 ralkap 5 nunnak a liamnak tiah theih a si.

June 18 ni ah a chuak mi Chin hriamtlai phu hnih karlak kahdohnak kong ah Chin Brotherhood nih cathanh an chuah hmasa i cu an cathanh mi ahcun Operation CB min bunh in kahdohnak an tuahnak ah Cin Duai khua an lak i, Tedim le Matupi ah kahdohnak an tuah cuahmah nak kong le Matupi khuapi chung SAC ralkap No. 304 Light Infantry Battalion camp an lak nak kong an langhter.

Cun SAC ralkap No. 140 Infantry Battalion camp kan nam cuahmah lio ah Chin miphun sersiamnak kan tuah lai tiah a au mi CNF/CNA le ttangtti phu hna nih ruah loin an hong kan kah. Cucaah kan hnung leiin Chinland Council ralkap le kan hmailei in SAC ralkap nih an kan karceh in an kan kah cuahmah lio a si tiah an langhter.

June 17 ni zaanlei sang ah CNA ralkap pakhat cu SAC ralkap No. 140 Infantry battalion camp lei ah a rat caah security ca ruat in kan rak tlaih, biahalnak kan tuah hnu ah thaizing ah thlah kan timh.

Asinain June 18 ni ka ah Chinland ralkap hna nih cun mizapi thawh mi phaisa in an cawk mi Drone in 40mm, 60mm bomb an hong kan thlak hnawh caah kan ralkap 2 nunnak a liam mi hliam a tuar mi an tam tiah an langhter.

Hi bantuk in an kan tuahto ruangah kan kah hna nak a si tihi mizapi theihternak kan in tuah hna tiah an langhter chap.

Chinland Council ralkap hna nih hin MTC/MDF zong an luh hnawh hna i an rak kah bal cang hna. Cucaah atu bantuk in SAC ralkap he an kan karceh i an kan kah caah kan nih zong nih a si khawh chung in kan lehrulh ve hna lai tiah cathanh an chuah mi ahcun an langhter.

Cun Chinland Council zong nih cun Chin ram chung ah SAC ralkap thianhhliamh rian an i hmaithlak caah Cikha le Tonzang khuapi an lak khawh nak kong an langhter.

Cun Matupi khuapi hrambunh SAC ralkap No. 140 Infantry Battalion camp lak kahdohnak tuah ding in an i timh lam cuahmah lio ah AA le ttangtti phu hna nih cun June 17 ni ah Matupi khuapi chung ah ral zaam mi hna a chia thlah tu kan ralkap pakhat an tlaih hlei ah kahdohnak kan tuahnak hmun Pha Naing khua le SAC ralkap No. 140 LB camp karlak ah an kan kham riangmang i kahdohnak tuah kho lo in kan tuah caah kaphnih karlak kahdohnak a chuahnak hi a si tiah an langhter.

Kan ram zalonnak ca ruat in baitak tein kahdohnak a tuah cuahmah tu Chinland Council, Chin Cozah defense ministry tangah a um mi CDF-Matupi Brigade 2 telh in ttangtti phu hna nih ral he pehtlai in an cawlcanghnak hrimhrim ah donhkhanhnak tuah lo ding in le kan nih nih cun SAC ralkap No. 140 Infantry Battalion le Byo Ha kung a rannak in kan lak khawhnak hnga kan i zuam rih ko lai tiah cathanh an chuah mi ahcun an langhter.

CDF-Matupi Brigade 2 zong nih cathanh an chuah ve, Matupi khuapi ah kahdohnak kan tuah hlan April 26 lio tein kaphnih ceihhmaitti nak kan rak tuah cang. Cu ah cun AA tang ah kahdohnak tuah ding in Brigade 1 ni biatung an chuah pi nain kan nih Brigade 2 nih kan duh lo tiah kan rak ti cang. Khuapi chung kahdohnak tuah tikah Paletwa Lampi cungah a um mi hi Brigade 1 nih nan kah lai i, Hakha lampi cungah a um mi hi Brigade 2 nih kan kah ve lai tiah kaphnih lungtlinnak kan rak tuah cang mi a si.

Cucaah May 6 ni khan ralhrang camp lak kahdohnak cu kan hawile hna he kan rak thok cang. June 17 ni tiang zongah camp lak ding in caan tlawmpal te ai duh ah khin Pha Nain khua ah umkal ai harh mi minung 8 an rak um caah cu hna va lak awk ah mawtaw pakhat kan thlah, cu lio ahcun timh cia tein a rak kan bawh tu AA le ttangtti phu nih cun mawtaw mawngtu cu an rak tlaih.

Hi bantuk in ri kan khiah mi lonh in ral kan dohnak hmun in chuak ding in le Chin miphun karlak ah i huatnak karh ding in AA nih a tawlrel nak hi kan duh hrimhrim lo. Kan rak thok cang mi ralhmun in hnu an pil duh lo a si ahcun Chinland Council ralkap hna nih pehzulh in kan doh hna lai tiah theihternak an tuah ve.

Chin Land Council ralkap nih hin Tedim hi lak lawlaw an rak i tim, asinain cu thawngpang a theitu Chin Brotherhood nih an rak luh kanh hna i Tedim khuapi cu a ciam dih deng cang. Cucaah Tedim cu CB kut ah a um cang ko tiah an hnga a ngam i, Matupi khuapi lak kahdohnak tuah a tim tu Chinland Council ralkap hna nih khuapi an luh hnawh hlan ah Matupi zong an luh hnawh tthan caah atu bantuk in buainak a chuahnak hi a si tiah Matupi khuami pakhat nih a langhter.

Hi bantuk in mah le mah i kah hi kan duh bak lo, asi khawh chung in cunglei bawi hna nih khua kan ruah piak hna sehlaw remdaihnak in thil rawlrel zau hna sehlaw kan duh ko tiah a langhter chap.