Home Department lei bialeng ning ah Myanmar ram in Mizoram ah ralzaam minung 33,926 an um. Kum 2021 Nohawng 1 ralhraang nih nawlngeihnak laak an timh thawk in Mizoram ah a zaammi an karh. Nai cikua tiang a lut mi an um rih. Pengkomh (District) 11 ah an um hna i, minung pa 10,177 le nu 10,905 le ngakchia 12,844 an si. Myanmar ralzaam 9,987 hi relief camp 111 ah an um. Minung 9,905 cu chungkhat sahlawh le innhlang in an um.
Bangladesh Chittagong Hill Tracts in Mizoram ah a lutmi hna hi Lawngtlai District lawng ah an um tiah Department haotu hna nih an chim. Tu ah hin minung 1,872 an um. An lak ah minung 580 hi pa an si i nu 499 le ngakchia 793 an si. Minung zeimawzat hi Lawngtlai District Relief Camp 12 ah an um. A dang cu khua 11 ah chungkhat sahlawh sinah an um.
Bangladesh in ralzaam lutmi hna hi Bawm miphun an si bik. Anmah nih cun Kuki-Chin tiah an i ti. Kuki-Chin National Army nih Chittagong Hill Tracts an umnak ah nawlngeihnak sang deuh an hal ruang ah Bangladesh cozah ralkap he an i kah caah ralzaam an umnak a si.
Nikum Biangreithlep 3 in Manipur ah miphun le miphun kar buainak ruangah umnak inn lo ngei lo le nunhimnak kawl in Mizoram ah lut mi minung 8,951 an um An lak ah minung 1,294 hi Relief camp 23 ah an um i, minung 7,657 hi Mizoram District 9 ah an um. Hnahthial le Lunglei District ah Manipur ralzaam an um ve lo.
Leave a Reply