Tamu Khuapi, India-Myanmar Ramri Ah Thilzuar Mi Myanmar Nu Hna Cu Assam Rifles Nih Zohchia Ngai In An Tuaitam Hna

Tamu khuapi in Moreh khuapi ah zingka tuante in thilzuar ding in a kalmi Myanmar ram mi nu 10 leng cu Assam Rifles nih ramri hleidonh pawng Myanmar ram lei kap ah an ṭum hnawh hna i zohchia ngai in an tuaitam hna.

“Tamu lei in Moreh market ah thilzuar ding in a kal mi nu hna cu Assam Rifles nih ramri tung 76 le 77 kar ramri hleidonh Myanmar ram lei kap ah an kham hna i fung in an tuk hna, nu cheukhat cu an hnuk le an chiaṭha ah fung in an sawh hna, chek ding an ti hna ahcun ṭha tein chek ding an si ko nain zohchia ngai in an tuaitam hna” tiah anmah he naihniam pakhat nih a chim.

Hi kong he pehtlai in Moreh khuapi zatlang phu pakhat a si mi HTC Committee in ṭuanvo ngeitu pakhat zong nih “Fung in an tuk hna ti mi cu a dik ko, an phei ah fung tuknak hmape zong a um, Chin nu pakhat zong nih ka hnuk zong an ka tongh tiin a chim, kannih zong nih KWHRO sin ah kan kuat, nu konglam a si ca ah dantatnak tuah kho ding in kan kalpi lio a si” tiah a chim ve.

India-Myanmar ramri Tamu khuapi le a kiangkap ah Manipur nawlngeitu hna nih ramri humhimnak ca ah tiin ramri um khuate cheukhat ah BSF ramri hngaktu ralkap chiah ding in timhlamhnak an ngei i Tengnoupal pengkomh, Kuki Inpi le zatlang phu dihlak nih an duh lonak kong an langhter.