Taingen Panh In Rallam A Sial Mi SAC Ralhraang Bomb Puah Hnawh An Ton Caah An Tuar Faak Ngai

Chin ramkulh,Tedim peng Taingen khua i an rak sungh mi sakhaan cu laak than dingin rallam a sial mi SAC ralhraang hna cu lam tantim ah bomb puah hnawh an ton caah an tuar a faak ngai tiah theih a si.
Nizan June 19 ah khan Kenedy tlang SAC sakhaan in Tedim – Kalay lampi hrawngin rallam a sial mi thazaang 100 tluk SAC ralhraang hna cu bomb a thluan thluan in chiah mi (Padeta Mines) in an puah hnawh hna hi a si.
“Kenedy tlang sakhaan an laak hnu ah Taingen lei panh in rallam a rak sial mi SAC ralhraang thazaang 100 tluk cu bomb (Mines) in kan puah hnawh hna i an tuar faak ngai.hmai an rak fawn ah cun an tuar rih lai.a tu zong bomb phun phun an i ton cuahmah i bomb thawng a thang len ko.zeizat an thih bel kan thei kho rih lo.bomb puah hnawh an si hnu in hmai an fawng ti lo.Motor lampi cung le ramtaang he tiin rallam an rak sial hi a si.” tiah CDF/CDM-Siyin in rianngeitu pakhat nih Mizzima ah a chim.
A tu ah SAC ralhraang hna cu Taingen khua le Sozang khua karlak ah an i taap i kaphnih kar boruak a linsa ngai ngai tiah theih a si.
SAC ralhraang nih an rak tlaih mi Sozang khuami minung 5 cu June 19 zaanlei ah khan an thlah than cang hna tiah theih a si i a tu lio boruak ruangah Tedim-Kalay lampi cung um mi khuate tamdeuh cu ral an zaam viar tiah theih a si.
Taingen sakhaan cu CDF/CDM –Siyin le Chinland Council ralkap bu hna i bawm in 2024 January 16 ah an rak laak mi a si.

Be the first to comment

Leave a Reply

Your email address will not be published.


*