Rakhine ram Mawng Taw peng ah a um mi ramri hngak palik camp cu AA le ttangtti phu nih an va luh hnawh hna i an camp ning in an lak tiah theih a si. Mawng Taw peng ramri hngak palik minung 300 tluk nih an hngah mi A Le Taan Caw ramri hngak palik camp cu June 9 ni ah khan AA le ttangtti phu nih an rak nam cang hna i June 12 ni ah tlamtling tein an lak khawh hi a si.
June 11 ni khan ramri hngak palik hna le an chungkhar hna cu pehtlaih awk an ttha ti lo tiah SAC ralkap kuttang Myanmar Police Force thawnghram pakhat nih a langhter.
Cucaah No. 6, 7, le 9 ramri hngak palik hna le an chungkhar hna an dihlak minung 400 tluk cu AA kut ah an um hna. A hnu ah pehtlaihnak a tuah tthan mi an um, cu hna lak zongah cun pehtlaih awk a ttha ti lo mi an um tthan. Cun pehtlaih awk a ttha lo mi le an sining theih lo mi hi a za za in an um, a zat bal te cu cunglei bawilawng nih an theih lai tiah SAC ralkap chung thawnghram pakhat nih cun a langhter.
AA nih an tlaih mi hna palik le an chungkhar hna telh in minung 400 hrawng cu AA siannak in an chungkhar le an pehtlaih khawh hna tiah theih a si.
Mawng Taw peng SAC ralkap camp hna cu pehzulh in AA le ttangtti phu nih biatak tein an nam tthan hna i No. 4 ramri hngak palik camp telh in camp dandang zong kan nam colh hna lai tiah AA nih cun langhter.
June 7 ni zong ah khan SAC ralkap dirhmun in tuan teah nan hriamnam tangah nan chiah i nan i pek ahcun nan nunnak caah thinphang lo in nan um kho lai tiah an rak langhter bal cang. Rakhine ram in a rannak in SAC ralkap pawl a rannak in dawi dih zau i, confederate nakin a niam lo mi mah te i uknak cu a hal in hal loin a lak bak in kan lak lai i kan hman colh lai tiah AA ralbawi zik Tun Myat Naing nih a rak chim.
Leave a Reply